... قطوتي الخاينة ...

العام في موسم الشتاء والدنيا مطر 
شفت قطو غمضني . 
يالس تحت الشيرة وينتفض بكبره 
قلت بخاطري اساعده ولا لا .!
جان اذكر سالفة جديمة .
هذا القطو ذكرني فيها بخبركم عنها . 




كانت عندي قطوه من النوع الراقي !!!
بنت عز ووحده مدلعه ومتعلمه مب اي قطوه
واحلا شي فيها شعرها.... يخبل ....
وأذكر كانوا فالبيت يحاتونها اكثر عني
والظهر انا أقيل علي يدار البيت .....يامضروب ولااا رايغيني من البيت ... وهي في الصاله ومكيف ابو حصان ينفخ عليها لوووووول
وشووو قطاو الفريج متخبلين عليها
وواحد منهم بيموت ومستعد يسوي اي شي عسبها
اذكر مرة حصلتها في الحوي وفي قطويتحرش فيها  وهي يالسه مثل الملكه وجان اعتزي واقوله كش كش وجان يطالعني بنظره. وبغيت اصرط ريجي ماقدرت وجان أأخر خطوه واستعد عشان اسنفر بحياتي ...

شكله مخيف مادري من وين ياي هذا !!
مثل الواحد المعفوص... وراسه كبر اليدار ومايقول الميااااااو العاديه الي نحن نعرفها لا
يقول باااااو بااااااو وانا يوم انا صغير فسرتها على انها بجتلك بجتلك لووووووول الخايس يهددني بالقتل
هذا مب قطو مطابخ عادي........هذا الزعيم مالهم 

وتميت كل يوم في ضرابه معاها ويا أنا  يالقطو ومرت الأيام وسافرنا وجان يختليبها النذل وانا مادري ويوم رجعنا من السفر ماحصلتها في البيت ...علمها علي الهياته والرغده والسهرات لين ماضيعها لا بركتن فيه

وبعد كم شهر انها حامل وجان تربي وتيب عيال شرات ابوهم الا أعور ولا مافي ذنين يعني اشكال مجرمين وقطاع طرق وجان تشرد مع حبيبها السباله وباعتني برخص التراب وانا الي كنت أحايز وادافع عنها لكن ماقول غير حسبي الله ونعم الوكيل
ومن عقب هذاك اليوم كرهت كل البنات 

اااااااخ يالقهر
كم كنت اتصفع عسبها
اسرق السمج لأجل عيونها
واقيل فوق اليدار وهي في الصالها عشان راحتها ..

بس دارت الأيام والله يابها
كنت طالب سندويجة بيض  من راعي الدكان الا عدال بيتنا
دكانا عجيب هو خياط ودكان في نفس الوقت..........
قبل لا انظمه ولا قوانين المهم عنده يطلعله فايدة
المهم يوم يابلي السندويجة وفتحت باب الحوي وخذت سندويجتي ويوم توني باسكر الباب
جان اشوفها واقفه من بعيد تطالعني وهي شاله وصاخت الدنيا كلها فيها
جنها طايحه في وحل...
وجان إطالعني بنظره كلها شوق وحنان وفيها شي من الحزن والندم
وجان تنزل عينها
وانا أطالعها واصغر عيوني جني اشوف شي بعيد (احاول استرجع الذكريات)
وجان ترفع عينها وترد تنزلها (لانها خاينه)
وجان اتمالك نفسي وارقع الباب بكل قوه واسند ظهري علي الباب وانا حزين ومنزل راسي (فلم هندي) ورجعت داخل البيت وانا أعتصر الماً واكل سندويجتي وانا حزين وحذفتها من بالي ونسيتها للأبد..

بس الله ياخذه هالقطو ذكرني فيها .
ولان قلبي طيب شليته من تحت الشيره
وحطيته بمكان دافئ .
حسيت ان القطو يقول بخاطره وايد عليك .
استحيت من نفسي ويبتله فانيله جديمه كانت بدبة السياره انظفبها السياره ..ولحفته بالفانيله . القطو اغمى عليه !!.. مادري من الريحه ولااا من الفرحه الله يعلم .. شورايكم انتو لوووووووووووول 

.. قصتي وانا في مول الامارات ..

في يوم من الايام سرنا ال (Ski) مال التزحلق في مول الأمارات
المكان حلو بس بارد والجو داخل غير شكل !! شي عجيب مب متعودين عليه....
والتزحلق رياضه حلوه بس يبغيلها توازن وممارسه
وانصح بالتجربه بس ترا الموضوع مب بسيط........يعني الواحد لازم يتمردغ مليون مره لين مايتعلم يوقف علي البورد...

وياكل طن من الثلج لين مايتعلم كيف يتحرك..
واذا تعلم كيف يتحرك لازم يتعلم كيف يلف يمين ويسار...
وإذا بيتعلم كيف يلف لازم يضحي باخر فقره في العامود الفقري  وهذه من الأولويات طبعاً

اما الأشياء الا ماتنذكر وهي الفج وخلع الجتف وتمزق الأربطه هاي أشياء لا بد منها 

انا اول مره دخلت تميت فاج حلجي ومبهت ومادري شووو السالفه!!
جان اسير اوني عاد ولد عز ومتعود علي الثلج...قمت اسوي كور صغار وافرهن على ربعي
قالولي لا يابويه شوووووووو هذا الفقري

ركبوني التل فريك وانا مستانس ثلج وتل فريك تخبلت...كان ودي انصب خيمه واوري ضو........كنت بيلس طووول الصيف هناك وباشتي لووووول سحبوني من ريلي ويديه ...
المهم ركبنا التل فريك وانا اشوف المنظر كله ابيض في ابيض ودوووني اعلى شي وقالو شوووفنا وسو شراتنا وانا اتحراهم هم البرفشنليه والحريفه ثرهم طلعوا والخيبتين....تجليب من فوووق لين تحت فقتهم لووووول
وانا استويت مثل النجال مال الرمل.....مثل النجال اللي  يشل الرمل ويرفع الرمل فووووق...جي استويت .......
كل مأوقف اطيح علي ضروووسي واشل الثلج بضروسي واقوم وارد اطيح واقوم واطيح لين وصلت تحت والناس اطالع ومبصوطه يتحرون بابه نويل ياهم !!
ويهي كله ابيض
ومع الممارسه ماشالله تحسن ويهي اقصد مستوايه 
بس المشكله اني افقد توازني يوم اكون فنص الصاله . ربعي يخبروني من كثر ان مافيني توازن مول وانا لابس الجوتي مال التزلج كنت اركض وانا واقف مكاني لين ماندبغت على ويهي .
 لان اصلا من قبل الدبغه وانا فاقد الحاسيه . !! 
القهر اني كنت اسولف ويا واحد صغير بالعمر كان متشربص وياي فالحاجز وكنا نتزلج شوي شوي .
 قالي انت عود ماتعرف تزلج ؟! قلت له لا فديتك انا حاطيني ارقابكم واعلمكم كيف تزلجون .
 ماخلصت جملتي الا واحد من ربعي ساحبني من جاكيتي .!!
 وتوهقت ويا الصغير وين بوديهي ويهي ماعرف اتزلج !! امشي شوي واطيح.. امشي شوي واطيح ..وكل طيحه اخس عن الثانيه . .وكل ماطيح اقول حق الياهل شوف لاطيح مثل هاي الطيحه.. وشاف الطيحات كلها !!
ورجعت البيت وقمت اتفرك بفكس وصرطلي حبتين بروفين وتم جسمي اسبوع مترضض انا وين والتزلج وين 

.. سالفتي في أحدى المنتديات ...

يقولون الفنانه أحلام (زعلانه ) من الفنانه أصاله ،،،،، الفنانه أصاله ( أصلا) ماترد على (تفاهات ) أحلام ،،،، الفنانه أحلام حامل ،،،، الفنانه أحلام بتولد بعد يومين ،،، الفنانه شريهان ستعود للتمثيل ،،،،، وفاه الفنانه سعاد نصر ،،،،

نتأثر ( شئنا أم أبينا) بالفنانين جميعا ،،،، نحس بأنهم جزء من عائلتنا ،،،، شفتوا كيف تأثير الاعلام علينا ،،، حتى مرات من كثر ماشوف الرسوم المتحركه أحس بأن توم وجيري عيال عمي ؟؟؟؟

ماعلينا بخبركم قصتي مع احدى المنتديات 

في إحدى المـــرات إنتحلت شخصية فتاه ودخلت بأحد المنتديات ،،،، بصراحة بيني وبينكم اكتشفت كم نحن العرب نقدس المرأة ونحترمها ،،،، مجاملات في الردود ،،، رسائل غرامية على صندوق الرسائل ،،، حتى لو كتبت موضوع تافه تحصل المنافقين يتنططون حواليك ويمدحونك ،،،،، والكل يقول ( أختي ) ؟؟؟ وبعد اسابيع أحصل الاخ اللي يقول لي ( أختي ) مطرشلي رقم موبايلة ؟؟؟

المهم ،،، أنا عجبتني السالفة ،،، كنت مسمي عمري ( ريانة العود ) ،،،،، ومع الوقت حبيت هذا المنتدى وحبيت (الاخوان ) اللي فيه ،،،،

الى الان السالفة عادية وتحصل بأحسن العوائل ،،،، بس اللي ما يحصل بأحسن العوائل هو أنني بدأت أخذ الموضوع على محمل الجد ؟؟؟؟

ففي ليلة شديدة السواد ،،، وهي نفس الليلة اللي ما طلع فيها القمر ،،، قررت مصارحة ( الاخوان ) بأنني واحد من نفس جنسهم ،،، وأنني لست فتاه ،،،،،

بيني وبينكم خفت ،،، تلعثمت ،،، سال اللعاب من فمي من شده الخوف ،،، فهناك قلوب سوف تنكسر وتتحطم ،،، وبخاصة ( فتى العين ) ،،، كان كل يوم يطرشلي بوسةعالرسايل الخاصه ،،، والله لو حتى كنت أمه ما باسني هالكثر ؟؟؟؟

وتأثرت عندما علمت كم سأترك قلب الحبيب ( كلي حزن ) ،، الذي هو الاخر كان يحلف بأغلض الايمان بأنه ما يعرف أحد غيري ؟؟؟

بيني وبينكم ،،، وعلشان أنا ما حب الفضايح ما بقول أن الاخوان :- حبيب الكل ،،، ماجد زماني ،،، فتى الغربية ،،، الوسيم ،،، أنا وبس ،،، الخ الخ الخ كانوا يغازلوني مع انني كنت بنت ناس ؟؟؟؟

على طاري أنا بنت ناس ،،، ألاحظ ان الكل قام يقول هالكلمة ،،، يعني منو قال انج بنت زرافة او بنت ضبعة ؟؟؟

المهم دخلت المنتدى ،،، ( وبطيت ) المفاجأة ،،،، الجميع لم يصدقني ،،، الكل قال بأني كذابة ،،، حتى واحد منهم قال حتى لو كنت واحد على الاقل احترم مشاعرنا وتم اسبوع بنت ؟؟؟؟

هذي قصتي مع ( أحلام الشباب ) بالمنتدى ،،،،أقولها لكم يا بنات وأنا واحدة منكم ،،، أقصد ،،، وأنا مثل ( أخوكم ) ،،،،

ديروا بالكم ،،، لا تصدقون أي شخص بالشبكه العنكبوتية ،،،

الحياة مليانه ذئاب بشرية ،،،

اختكم ريانة العود سابقاً

أخوكم فهد حاليا ؟؟؟

..ذكريات التصفيع ..

ياما تصفعت 
مشاوت من نص الحوي لين برع البيت وارد اضحك عادي لووووووول ( متعود )

ماتم شي مانضربت به....اي شي عدال الوالده ثواني بس ويلصق في راسي .......اي شي....فنيال دله حتى كيبل الكهرباءالا فيه ثلاث رؤس عادي يكون مطبوع في يبهتي لووووول
علي الداخل والطالع انضرب !!!!
شووو السالفه مادري بس الطراق ياي ياي
احاول اتفاهم واتناقش عشان نطلع بحل يرضي الطرفين مافي فايده......كف واحد وينتهي النقاش  
دقوا الجرس انضربنا..!! انزين برع داقين جرس البيت اتصفع انا ليش !!
تزعل ماتبغي غدا تتصفع..!!!
بتيلس روحك تفكر قالوا هااااااا شي مسوي وطراقات ويمردغوبك علي الرمل لين ماتعترف وانت ماتدري شووو مستوي 

عنبو الواحد يستوي قطو من كثر الضرب......اذكر مره متعلق في اللوزه ومب راضي انزل والوالده تتحلف وانا لاوي علي اللوزه بيديه وريولي وماتم شي مافرتني به......حشا تقول ابليس مب ولدها

حتى البشكاره تفاتن وسارت ويابت هوز الماي وتمت ترش علي. قسم بالله كان بخاطري انزل واصفعها

 بس الوالده تحت بتمرغني  شووو هالحاله لا كبريا ولا برستيج 

حتى على دخلت الوالد راد من الدوام وشافني متعلق فاللوزه 

قال شو مسوي ملعون الصير هذا ؟

قالوله ضارب اخوه .. جان يفرني بنعال .!

الله لايعودها من ايام لووووووووووول

.... لغز بسيط وعليه جائزة .....

1

3

5

7

9

11

13

15

17

19

مجموع الارقام =100 

المطلوب : خمس ارقام من الارقام اللي موجوده فوق يكون مجموعهم ( 50 ) فقط

شرط : لايتكرر الرقم مرتين 

والعملية عملية جمع فقط  

الجائزه : جائزة قيمة ( مفاجئة ) 

.. مقتطفات سريعة ..

& بعض الديسكوهات ،،،يعني المراقص ،،، تشترط لارتيادها الدخول بملابس رسميه ،،،يعني يا بدله كامله ،،،او جينز بدون حذاء رياضي ،،، المهم لازم تكون محترم ،،،،شوفو قمه التناقض ،،،لازم تكون محترم في مكان غير محترم ،،، قمه التطور

& دائما الشباب يوصلون الى مكان الحريق قبل سيارات المطافي ؟؟؟؟ يمكن السبب المطبات!!

& البدايه تكون ،،، عبايه فرنسيه ،،، وكعب عالي ،،، والنهايه معروفه ،،،إنته ما عندك أخوات ،،، منتهى التناقض ،،،يعني ،،، أخلاق غير صالحه للشرب ؟؟؟؟

& من يذهب الى أمريكا وأوربا ما يسمع عن شي إسمه ،،هات صوره الجواز ،، هات صوره ملكيه البيت ،، يعني بإختصار الجماعه ما يصورون شي ،،،، تعال تفضل وزور البلاد العربيه ،،، شوارع بأكملها شغلها الشاغل (تصوير ونسخ) ،،،،

& ثلاثه لا تصدقهم :- المقاول + محلل الاسهم + موظف السلفيات بالبنك

& قريه ،،، أو مستعمره صغيره ،،، يطلق عليها اسم ( الاماراتيون الحمر ) ،،،، تيمنا ( بالهنود الحمر بأمريكا )،،،،،،((( الاماراتيون الحمر))) هم سكان الامارات ،،،ولكن مع تزايد العماله الوافده أصبحو أقليه ،،،، يذهب اليهم السواح الاجانب لالتقاط الصور التذكاريه معهم ،،،،،

& البطل يقود سياره فارهه ،، سعرها ربع مليون درهم ،، لوحه الارقام مكونه من رقمين ،،، فجأه ( يدح) بريك ،،، تعرفون ليش ،، لأن الحبيب شاف (رادار ثابت) ؟؟؟؟ اللي نعرفه إن عيال العز مايحاتون شي ،،، عيل البطل هذا أكيد ولد فقر بس مدلع نفسه ،،،،

& القصه تعاد عشرين مره بحياه البطل ،،، يحاول التعرف على فتاه بالنت ،،، ينصب شباكه العنكبوتيه ،،، يبدأ بالحديث عن مكارم الاخلاق ،، والقيم والمثل ،، وحتى الدين لم يسلم منه ،،،المهم تقع الضحيه فريسه لفارس الاحلام ،،، مخرج الفيلم يبقي على البطل الوسيم ،، ويستبدل الفتاه بإخرى ،،، المهم ،، الفيلم هذا له عده أجزاء ،، من الجزء الاول ولغايه الجزء العشرين ،،، والبطل هو نفس البطل ،،،ياكثرهم فالشبكة العنكبوتية

& يعني معقوله وحده جميله جمال صارخ ،، وتحب مطرب أسمر ؟؟؟ يعني معقوله وحده لبنانيه تحب واحد خليجي ؟؟؟؟ بالعقل يا مخرجي الفيديو كليبات ،،، يعني أسمر يحب سمرا أوكيه ،،، أبيض يحب بيضا بعد أوكيه ،،، أما ما نشاهده الان على التلفزون غير صحيح ،،، يمكن أنا غلطان شباب بسبب أن ( الحب أعمى ) ؟؟؟


& (المدواخ ) ،، ماعرف من وين يابولنا هالصرعه ،،، تشوف الشباب بهالمداويخ تقول الجماعه (هنود حمر) ،،، يمكن تكون موضه ونا مادري ،،، ع العموم ،، شكرا للبلديات ،، وألف شكر للعمل والعمال ،، وثلاثه الاف تحيه شكر لغرفه التجاره والصناعه ،،، لتصريحهم بفتح محلات لبيع (المداويخ) ،، على فكره ،، سنه أو سنتين ،، وهاي لحيتي ،، إن ما شفتو واحد يطلع بالجريده ويقول :- البلديات تمنع الترخيص لمحال بيع المداويخ ،،، يعني لازم حد يصاب بالسرطان عشان نقتنع ،،، يعني لازم واحد يروح علاج بالخارج والسبه المدواخ عشان نقتنع ،،،، ماقول غير ،،، دوخو ،،، دوخو ،،، وماعليكم من كلامي

& صوره الأخت (المنقبه ) بالجرايد ما هو الغرض منها ،،،،، يعني وحده ماخذين رايها في موضوع عام ،،، وحاطين صورتها بالنقاب ،،، ماهو القصد من وضع صوره الاخت هذي ،،،، نحن ما نقول كشفي عن وجهك ،،، نحن نقول لو ما تتصورين يكون أحسن ،،،، يعني تخيلو ،،، الاخت فرحانه وتراوي صورتها لزميلاتها وتقول لهم ،،، هذي أنا ،،، والله هذي أنا ،،،، الخلاصه ،،، لا تتصورين أحسن وخلج ثجيله ،

& كل واحد فينا يكون صريح مع نفسه ،،،هل فعلا منظر الغروب يعني لك شي ،،،، هل إبتسامه طفل تعني لك شي ،،،، هل رأيتك لمنظر سقوط المطر يعني لك شي ،،،، هل البحر يعني لك شي ،،، بيني وبينكم ،،، ومن غير محد يعرف ،،، وخلو الموضوع (سر) بيني وبينكم ،،، هذي الاشياء ما تعني لي شي ،،، إلا إذا كان اللي يسألني وحده مب واحد ،،، فإذا كانت وحده على طول بقول لها ،،،، صدقيني أنا من هواه غروب الشمس ،،، وأنا الاطفال بحياتي كل شي ،،،، صج ما عندي سالفه،،، علشان جذيه يقول علماء النفس إن الانسان يعيش بوجهين

& على طاري علماء النفس ،،، أجرى علماء النفس بألمانيا تجربه أحضروا فيها فتاه سمينه (متينه) وأعطوها كيس مملوأ ببرتقال وأوصوها بأن تسقط الكيس من يديها بالشارع العام لكي يروا رده فعل الاشخاص الذين بالشارع ،،، فلما فعلت ما طلب منها ،،لم يهتم أحد بمساعدتها ،،،فأحضروا فتاه أخرى (جميله) وأعطوها أيضا كميه من البرتقال وبنفس الطريقه أوصوها بأن تسقط الكيس من يدها ،، فلما فعلت ذلك ،،، هب كل من بالشارع لمساعدتها ،،،، هذا الكلام بألمانيا طبعا شباب ،،، أما عندنا والله ربعنا لا يخلون متينه ولا ضعيفه ،،، يعني نحن مب مال تجارب ،،، نحن نحب الحرييييييييييييييييييم

& شاهدت قبل أيام شخص أوربي يصور أحد شوارع العاصمه أبوظبي ،،،، ففرحت من كل قلبي ،،، وعندما اقتربت منه ورأى الابتسامه المشرقه على محياي ،،،بادرني بالسؤال :- شارع جميل ،،،فقلت :- نعم نعم ،،، والازهار أيضا جميله ،،،،فقال :- أنا لا أصور الشارع ،،، بل أصور اللوحات الارشاديه الموجوده على الشارع ؟؟؟ إستغربت من كلام الاخ ،،، فلما إبتعد قليلا أخذت (أعد) اللوحات ،،،وصدقوني إنصدمت لما عرفت إن العدد كان فوق الثلاثين لوحه ؟؟؟؟ ثلاثين لوحه بشارع واحد ،،، قف ،،، ممنوع الوقوف ،،، شارع فرعي ،، إفسح المجال ،،،، ليش ،،،، ليش هذا كله ،،،

& لماذا نصاب بالهلع عندما يحين موعد مغادره الخادمه الى بلادها ،،،، نخاف بأن تسرق شي قبل المغادره ،،،، صدقوني ياشباب ،،، الخادمه فقدت أثمن شي بالوجود ،،،فقدت سنوات عمرها التي لم ولن تعود ،،، فدعوها تأخذ معها ما خف وزنه وغلا ثمنه ،،، وهذه دعوه صادقه مني للسرقه ،،،خخخخخخخ

& بالأمس القريب تم منح فتاه سعوديه رخصه قياده طائره ؟؟؟؟ بالله عليكم حد يفهمني ،،،، ممنوع قياده السيارات بالارض ،،، ومسموح قياده الطائرات بالجو ؟؟؟ مستعد أدفع نص عمري واعرف ،،،،هل القياده بالجو يجوز ،،،والسواقه بالارض مكروهه ،،،،

& متحف مدينه العين يغلق في تمام الساعه الرابعه عصرا ؟؟؟؟ بالله عليكم حد يفهمني ،،،، مستعد أنتحر وحد يفهمني ليش ؟؟؟ ياجماعه الخير الساعه الرابعه موعد قدوم السواح ،،، ولا يمكن المتحف فاتحينه لموظفي المتحف وعوائلهم فقط ،،،،، هاااااااااااااااااااع

& حينما نسافر بالصيف ،،، نذهب الى أوربا أو أمريكا ،،، ونسكن بأفخم الفنادق ،،، ونذهب لمشاهده الاوبرا ،،، ونتزلج على الجليد ،،، ونركب بالدرجه الاولى بالطائره ،،، الخلاصه ،، ترجع الى البلد وأنت شخص أخر ،،،،،

حينما أسافر على حسابي ،،، أذهب الى بلد عربي ،،، وأعمل ألف حساب للشحاتين هناك ،،، وأسكن بفندق رخيص وأقنع نفسي بأنه فندق غالي ؟؟؟ وأتمشى بالسوق وأنا خائف ،، من ماذا لا أعلم ،،،،، أحس بأني غريب وخائف ،،، أخرج لأشم هواء ملوث ،،، ولا أزور الاماكن السياحيه لأنها مزدحمه وأسعارها مبالغ فيها ،،، الشغاله تسرقني والبواب ينهبني ،،، أعود للبلد وأسدد إلتزاماتي الماديه ،،، وأحس بأني الشيب برأسي قد زاد،،،،
قارنوا بين الدول الاوربيه والدول العربيه من ناحيه السياحه ،،،،، مقومات السياحه تختلف في المضمون ،،، السياحه للدول المتقدمه تعني المتعه والاستكشاف والمغامره ،،،، السياحه للدول العربيه تعني ،،، هذا أكيد معاه فلوس ،،،، يالله وراه ،،،،

... ذكريات فهد فالمدرسة العسكرية ...

في يوم من الايام كان واحد راقد عدالي

وانا ملان ماعندي شغل

وادور اي شي يونسني

الكل راقد

كنا يمكن خمسين واحد في غرفه وحده في المدرسه العسكريه

كانت ايام حلوه

المهم شو سويت

يبت الكركتر (مزيل الحبر)

وجان ايلس اصبغ واعدل العاهات الا في ويهه

وهو من الناس الا رقادهم ثجيل

وجان احطله علي حواجبه وستوا مثل سيارة الجيــب الا تضرب ليتات من بعيد

وحطيتله علي ظفور إيده وريله وستوا مثل البطه يوم تمشي في الظلام

وحطيتله روج علي براطمه وستوا مثل البقره الي شايفه حريجه

وحطيتله علامة الهنود في يبهته

يقولون الشباب يوم قمنا من الرقاد شفنا واحد  مثل الكشاف لابق بكبره

ماعرفنا شو هذا!!!

النور مالي الغرفه....يمشي وينور الا جدامه

وانا طبعاً قايم قبل الديج عشان اطلع اول واحد وابتعد عن الشبهات

وواقف في الميدان بكل عزيمه وقوه واتريا الجرس عشان نوقف بالطابور الصباحي

وليش ماااييي الخايس بدون مايغسل ويهه ومعاه ثنينه شهود (خونه)

وشافه القايد  ورتبته نقيب وقال وين (فهد ) يييبوه

وانا اوني أحترم الميدان (في العسكريه الميدان له إحترامه)

يعني الواحد يدخل ويطلع بنظام

يوم قالهم يييبوه

تقول حد قايللهم سيروا اجازه

الا يعرفني والا مايعرفني يبغي يأسرني طمعن في راحه او اي شي من القايد

تخيلوا الموقف

كنت عاطنهم ظهري وكنت اتكلم مع واحد بكل كبريا ...واخرط عليه ....وطايحبه جذب في جذب

واشرحله فنون القتال والتخفي

اوني عاد مستوي واحد 

مانتبهت الا عشره ناقزين علي

نقزوا علي نقزه جني بشرد كسروني الخياس

إنزين انا واقف ماركض!!

واحد دعمني براسه اول.... مادري ليش ماجدم يده!!

وواحد شاتني (إنزين انا ماركض غبي واحد)....انا واقف عادي

وواحد مسكني من ريل وحده ويبغي يشلني ....شفتوا الغبى...يعني انا كيف بمشي بريل وحده (شو بطه)

المهم شلوني من ريلي وايييدي وانا أودع الا كنت اخرط عليه واسويله علامة النصر بصبوعي الثنينه

المسكين يقولي تعال شو مستوي وين مودينك؟

اقوله إنتخبوني قايد للمدرسه (صدق كبرت في عينه) شفت حواجبه وقفن

  ونزلوني وقميص الدريس واصل علي راسي تقول وحده لابس عبايتها على راسها 

وحطوني جدام القايد في الميدان طبعاً 

الظهر والبطن مكشوف جني لبنانيه لووووول

وفشلت جميع التودداد بالقايد وحكم علي بقرعه ويسبحوني بماي بارد

وانا دايمن يوم يحكوم على واحد بالقرعه

انا اللي اخذ الميكينه وايلس اتفنن في تقريعته

اول شي اسويله شارع يبدا من اول اليبه لين قفاه

وبعدين من اذينيه اليمنى لين اليسرا (هي العاده الشايعه عندنا)

بس هذا الا خسستبه قال انا باسوي طريقه يديده فيك وانا افرك لحيتي واتناقش معاه 

قلتله كيف بتسوي

قال باسوي تحليقت إقحطه لووووووول

وسواها الخايس وخلا راسي فيه مثل البقعه الا في راس قحطه(كرهته )

هذا طبعاً كله في الميدان الساعه 5:30 الفجر واذكر كان برد ونفاف بسيط

بعد ماخلصت من عند الحلاق

يادور الثلاجه البارده

كان عندنا برد

ومن شدت البرد كانوا يبندون الثلاجه  لكن سبحان الله نسوا يبندونها البارحه

واخذت شور صباحي بدريسي وانا واقف مثل الأسد لووووووووول

وبعد ماخلصوا عطيتم 30 درهم إكراميه عشان السيرفيس...تدرون إنتوا مب زين بعد ماعطيهم شي واطلقوا صراحي وانا اتنافظ من البرد

..مقتطفات رايقة ..

( زليخه ) فتاه صغيره وجميله ولكنها لا تحب الطبخ ،، أنهت الثانوية العامة وبمعدل 92 % ولا زالت لا تحب المطبخ ،،، دخلت كلية التقنيه ولمده أربع سنوات ومازالت تكره شي اسمه الطبخ ،،، بعد إنهائها للدبلوم العالي تكتشف العائلة الكريمه بأن بنتها لا تعرف الطبخ ،،،،

يجتمع أفراد الاسرة لمناقشة هذا الموضوع الخطير ،،، فالفضيحه قادمه لا محاله عندما سيتقدم لها أحد من أبناء العمومه لخطبتها ويكتشف بأن البنت ( طمه ) ،، ولا تعرف شي من أساسيات فن الطبخ ،،،

يقرر أفراد الاسرة الاستنجاد بكتاب ( الشيخ رمزي ) أقصد الشيف رمزي وكتاب ( خفايف ) للأكلات الخليجيه ،،، وكتاب (الوجبات الصحيه ) عل وعسى بأن ينصلح حال البنت ،،،،

السؤال الان ،،، ما الفائدة من البنت خريجة الجامعه أو حتى طبيبة الاسنان أو سيدة الاعمال ،،،، ما الفائدة منهن وهن لا يجدن فن الطبخ ،،،، ما منهن فايده ،،، والله ما منهن فايده 
،،، صح كلامي يا شباب ،،،

............................


خمسه من ( جماعتنا ) من أغنى أغنياء العالم ،، بصراحه زين يوم( فضحوهم ) بالجرايد ،،،، أنا ساكن بجنب ( قصر ) واحد من هالمليارديريه ،،،، عندما يحين شهر الصوم (رمضان) ،،، أشيل صحن فاضي وأذهب ( خلف) القصر لكي أنال حصتي السنويه من (الهريس) ،،، طبعا الجماعه قاصدين يكون توزيع الهريس خلف القصر ،،، لأننا نحن الفقارى سوف نخرب ( البرستيج ) إذا ما دخلنا من الباب الرئيسي للقصر ،،،،، الهريس طبعا بدون لحم ،،،، اللهم لك الحمد على نعمك وعطائك ،،، اللهم اجعل الهريس بميزان حسناتهم يوم القيامه 
،،،، دعواتكم شباب ،،،،

........................................

أغلب الشركات الخاصه توظف ( سمبل ) مواطن ،،، يعني يوظفون مواطن واحد فقط لاغير ويضعونه في (الاستقبال) ،، ليكون واجهه للشركه الباحثه عن التوطين ،،، عزيزي القارئ ،،، لا تكن (سمبل) لأحد ،،،
،،،،، مفهوم ياشباب ،،،،

....................................



* تبحث الفتاه عن ( فارس أحلامها ) ،،، ويبحث الفتى عن فتاه أحلامه ،،، ويلتقي الحبيبين ،،، ويتم الزفاف ،،، بعد عشر سنين أو ،، عشر سنوات ،،، أو حتى عشر سنون ،،، يجلس الفتى بجانب فتاه أحلامه السابقه ويقول بخاطره ،،، بسم الله الرحمن ،،، وين كنت يوم خطبت هالبنت ؟؟؟ بالذمه هذا شكل ؟؟؟ وتنظر الفتاه الى فارس أحلامها السابق وتقول بخاطرها ،،، قل أعوذ برب الفلق ،،، بسم الله ،،، هذا واحد حد ياخذه ،،، ويا كرشته ؟؟؟ وتستمر الحياه ،،، وبعد كل عشر سنوات يجلس الزوجين أو الزوجان بجانب بعضهم البعض وكل واحد يقول بخاطره ،،،، بسم الله ،، قل أعوذ برب الفلق ؟؟؟؟

....................................

* يذهب ( عباس) مع المدام أو كما يحب هو أن يسميها ( الساحره ) الى أحد المجمعات التجاريه ،،، ( عباس ) يشاهد نظرات الاعجاب من بعض الفتيات ،، فيضن ويعتقد بأنهن قد وقعن في غرامه ،، وبأنه هو فتى أحلامهن ،،، المشكله إن ( الساحره ) كاشفه كل حركات وألاعيب ( عباس ) ،، فيزمجر ( عباس ) ويصرخ ويصبح عصبي المزاج ويبحث عن أي سبب لكي يرجع ( المدام ) للمنزل ،،، كي يعود هو ( للسنتر) بمفرده ،،، فيعود المسكين للسنتر فلا يجد من يبادله نظرات الاعجاب ،،، فيرجع مقهورا محزونا مهزوما الى زوجته وعياله ،،،، يا شباب ويا شابات  ،،، كم ( عباس ) تعرفونه بحياتكم اليوميه على هذا المنوال ؟؟؟ سؤال لكم 
وأنتظر منكم الاجابه ياشباب  

نغزه :- جارتنا مدرسه مواطنه للمرحله الابتدائيه،،، لديها طفلان ،،، ألحقتهم بمدرسه خاصه ،،، والسبب تقول :- المدارس الخاصه أحسن ؟؟؟؟ كيف ولماذا ولعل ،،، الله أعلم

..سالفتي لما كنت أسد فالجو ..

السلام عليكم 

كنا مايقارب 50 شخص نتدرب علي القفز بالمظلات وكانت هذه اول قفزه لنا 
وكان المدرب يقول اباكم اسود 
انا اقوله لا اسمحلي في هاي المواقف انا اعجبك 
قال ماعليه بنشوف فوق........قال فوق بتختلف الرمسه 
وجان اطالعه بنظره ثاقبه ومصغر عيوني اوني عاد متعود علي هذه المواقف...... 
وبعد التدريبات والتصفيع والترفيس والقلص فالسيارة 
( يقلصونا بالسيايير اونها عاد المظله 
ويبونا نتعود كيف نتخلص منها اذا الهوى سحبنا تحت على الارض ) 

بعد كراف كم شهر يت اللحظه الحاسمه لووووول 

ركبنا الطيارة وجان اسير اخر واحد اوني عاد عشان اخذ راحتي...... 
(طلعت علي اغلى من بيع السوق) 
اخر واحد يعني اشوفهم واحد واحد وهم يطلعون ويتعذبون .... 
يعني فلم رعب لووووول 
تميت ارتقل 
اشوف الواحد يوقف عند باب الطيارة وهو فاقد الأحساس في جميع اعضاء جسمه بمافيها البراطم والروان لوووووول 
والله من الزياغ اختربت عندي البرمجه وماعرفت ونسيت ان الريج ينصرط ولا يتيمع في البوز لوووووول 

وعلي فكره بعد مايفتحون باب الطيارة ماتقدر تسمع ولا تكلم ربيعك من قوة الأزعاج وسرعة الريح وصدعة مكاين الطيارة 
اول مافتحوا الباب ولبق الليت الأخضر 
يعني يالله ياشاطر راونا الشهامه والمروئه لوووووول 

وقبل هذه نسيت اقولكم ان الواحد مايوصل هذه المرحله الا يكون راضي وموافق علي كل شي.....يعني قبل هذه المرحله تكون في اختبارات وشرح مفصل عشان الناس الي تخاف وماتقدر مافي داعي تلتحق بهذه الدورة لانها مب لعبه.. 
اذا ماتبغي لا تسجل من اول شي او علي الأقل لا تركب الطيارة.....يعني كل شي محسوب حتى وقت الطيارة محسوب والبترول محسوب ولازم ترجع في وقت محدد وتطلع من الطيارة في وقت محدد عشان الطيارة ترجع في وقتها 
يعني عقب هذا كله ماتقدر اتي عند باب الطيارة وتقول : 
عفواً ممكن ارجع واكنسل...ترا انا اخاف لوووووول 

المهم انا تعنترت وسرت اخر واحد عشان اوني عاد قوي 
اتاري اخر واحد يشوف كل شي علي الطبيعه ويعيش لحظات عصيبه لووووول 
اول مالبق الليت الاخضر يأشرلك المدرب بصبعه عشان تطلع لان الصوت مش مسموع وإزعاج بشكل كبير والشباب خايفين ويتنافضون 
والله اذكر يوم كنا يالسين من كثر الخوف ركب ريولنا يداقن مع بعض ههههههه 
يوم اشروا حق اول واحد وكان واقف علي حد الباب لدرجه ان صبوع ريوله برع الطيارة وكعب ريله داخل الطيارة وتوه المسكين بيشل ريله عشان ينقز وينسحب سحبه قويه غصبن عنه .... 
هذا من سرعة الطيارة الهواء سحبه..........المهم نقز ههههههههه تنحسبله قفزه 

يالله خلصنا من واحد وجان يجدم الثاني وطبعاً كله مال بسرعه يعني مثلاً كل ثانيه يطلع واحد ومافي وقت لتفكير 
ويوم طلع الثاني شفت لسانه طلع قبله لووووووول 
وانا اشوف المشاهد كلها وتميت مثل المينون شو اسوي شو اسوي شو اسوي 
يتني صيحه بس تداركت الموضوع وقلت بعد مايستوي !!.... 
بي يوم من الايام وبخبر عيالي وعيال اعيالي وجيل ورى جيل وباقولهم ان الطيار فقد الوعي وانا سقت الطياره ونزلتها وانقذت البشريه (يعني من هذه السوالف)لوووووول 

المهم نقزوا كلهم وبدا فلم الرعب يقرب من نهايته وكلهم ماشالله عليهم طلعوا بس مافي واحد فيهم نقز لوووووول كلهم يسحبهم الهوا لوووووووووول 
وكلهم طلعوا في ثواني ومافي وقت لتفكير ووصل الدور لقبل الأخير وانا الأخير والي جدامي واحد متين يحليله ووايد كان يخاف بس كان يقول انا بضغط علي عمري ومابا اخلي الخوف يدخل قلبي... 
وجان يجدم بسرعه ويصد صوبي عشان يحمسني وجان يشوف الموت في عيوني هههههههه وخذت عنه التعنتيره ولا تمت شهامه ولا مروئه 
ومالت علي المريله ههههه 
يوم شافني وشاف الموت بعيني جان يستوي اخطبوط وحط يديه علي يمين ويسار باب الطيارة ونفس الشي ريوله من الخوف......يعني لو تموتون ماطلعت ... 
وهذا المشهد جدامي وانا الا فيني مكفني 
بعد ياخي ليش هذه الحركه الخايسه حرام عليك اتقي الله ههههههههه 
بس والله ماسووووله سالفه المدربين مشاوت بريولهم ومن بعيد عشان ممنوع يتقربون منه لان في احتمال يتشربص في واحد منهم ويسحبه معاه من الخوف... 
هم يشوتون وانا اراقب المشهد ويشوتون وانا مب في حاسيه 
اكلمهم اوني عاد بهدي الموضوع وانا اصلا زايغ وباموت من الخوف .... 
صوتي ماينسمع بس اوني عاد اسوي شي... 
أأشر بيدي اقولهم خلاص سكروا الباب وبنتفاهم تحت 
وشافني المدرب اجدم شوي شوي جان يحط يديه في صدري ويدزني ورا عشان مايسحبني ربيعي من الخوف 
وانا اقولهم خلاص خلاص مب مشكلة سكروا الباب وانا متنازل عن درجاتي حقه هو لوووووول 
حصل خير خويه مب مشكله (وانا امسح علي راس المدرب) وانا كلي حنان ومحبه 
وبعد مشاوت استمر 9 او 8 ثواني طلع مثل الصاروخ...... 
حصله شوووته طلعوا عرض من الطيارة تقول ياي يركض من بعيد ونقز لوووووووول 
وانا اراقب وقلبي يوصل لين ريلي ويرد يشوف الموقف ويرد تحت عند ريلي 
مرة احس بنبضات قلبي في صبوع ريولي ومرة في خشمي...... 
مادري وين طلعلي عرق في خشمي!!! 
المهم بعد ماطلع مثل السوبر مان اللتفتوا علي مال بسرعه ويأشرولي يبغوني اطلع بسرعه لان الطيارة اصلاً عدت الوقت المحسوب ب8 ثواني وقت الضرب 

وجان اجدم اوني عاد عادي عندي وانا اتخلخل من فوق لين تحت ومافي كنترول وجان يقبضني واحد من يدي عشان يجربني علي الباب وجان اصرخ في ذنيه اقوله خل الطيارة ترجع لان وايد ابتعدنا عن الموقع (اون حجه) ورفجتكم بس غمضت عيني تغميضه عاديه وفتحتها وحصلت عمري برع الطياره لووووول 
كيف طلعت مادري المهم نقزت ........... شاتوني رفسوني المهم اني نقزت وان حسبت لي قفزه لووووول

.. رحلتي الى العمرة ..

ليلة 27 
كنت يالس في الفندق واتجهز عشان اسير الحرم وجان اشوف الأعلان علي القناة السعوديه ان الليلة هاي هي ليلة 27 
وجان اطالع الوالده وقولها رااااااحوا 
(اقصد الزحمه الا بتكون عند باب الحرم)
جان تقول يابويه لاتسير في نصهم زين مافعصوك امس ...
قلت لها لو سمحتي خلج بعيد وشوفي الأقتحام ....وياجاتل يامجتول .... 
قالت زين واباك اتي حافي نفس امس يوم بغوا يجتلونك.... (الوالده الله يهديها دومها تحب تفشلني )
ترا بعض الأحيان الواحد يضطر انه يتخلا عن بعض ممتلكاته عشان ينفذ بجلده لوووووووول يعني بذمتكم واحد معصور ومايقدر يتنفس وطاحت طبجه وحده شووو يسوي يعني في نص العاصفه البشريه ؟؟؟؟ 
يعني تبغوني اقولهم عفواً ولو سمحتوا ممكن اخذ الطبجه الثانيه ولاااا يقدم تنازلت ويطلع علي الأقل بكندورته وهو سالم ويشتري اي زنوبه ويمشي حاله لووووول طبعاً الزنوبه زينه وزقرتيه والله سلم الكندوره ولا جان لطشوووووووها لوووووووول

وجان اخذ السجاده مالي وهاي شارنها مخصوص حق الحرم....هاي من النوع المتين عشان يوم اصلي القيام مأتعب من الوقفه
وجان اخذ معاها الكرسي هذا الا يجسف.....اعجبكم انا ...... 
واحد زقرتي ومستوي BOSS 
والكرسي هذا فيه مسنده لاني يوم اطول اليلسه وبدون ماتساند ظهري يتعب فارتاح واتساند وايلس 4 او 5 ساعات بدون اي مشكله

المهم خذت عدت الأقتحام وجان اودع الوالده واقولها تراني انا اليوم عندي مهمه صعبه وانتوا تسحروا ولا تتريوني ...... انا بادبر حالي 
جان تقول ماعليه بس ترا هذا فندقنا إيلاف كنده مب تسير تسال عنا في فندق التوحيد 

في واحد من الشباب الله يستر عليه من كثر ضغط الزحمه دار راسه وسار فندق التوحيد وقال حق صاحب الرسبشن لو سمحت الطيب كم رقم غرفتي....قال شو اسمك ....فلان بن فلان...قالوله ياخويه هذا الأسم مب عندنا....قالوله تاكد خويه احسن.....المهم اخر شي طلع فندق ثاني وجان اتلثم بالسفره واطلع لووووووووول مالي ويه بعد اقوله اسمحلي خويه انا غلطان 
شت !!!
اخس شي يوم الواحد ينسى وين ساكن ههههههههه

المهم بعد مارتبت حالي انطلقت للحرم مثل الأسد وعندي ثلاث اهداف ولو الموت ماتنازل عنهن 
اول هدف الجلوس علي الزوليه الحمره الا يفرشونها في الحرم ..
ثاني هدف يكون فلاص الماي عدالي عشان اشرب زمزم واخذ راحتي..
ثالث هدف اكون مجابل البكس الا يحطون فيه المصاحف عشان اقدر اسند ريلي علي هذا البكس وانا اقرا القران 
يعني بختصار شديد كنت ابغي ايلس علي الزوليه الحمره وجتفي اليمين داق فلاص الماي وريلي ممدوده ومسنوده علي البكس الا جدامي (يعني زعيم لأخر درجه )

وصلت عند الباب وقلت بسم الله وتوكلت علي الله وانقز في نص العاصفه وتميت مثل الواحد الا ماله شوووور........انا وياهم.....طلعه مابا اطلع وقلت خني في النص لين مايدخلوني معاهم 
وشوووووووو التلصيق هههههههههههه
والله قلت تلصيق ولا غيره مافي.....فجه مابى افج......متشربص فييهم ....اسمع واحد يقولي يابني سيب ايدي..... اقول بخاطري هالشيبه المخرف شوفيه طلعت ماسك ايده وانا مادري جان اقوله معليش ياحق وصنا خلاص .....واسمع الشرطي الا عند الباب يفاتن ويصارخ شوي شوي وجان اوقف مجابلنه والزحمه من ورايه مثل المويه والشرطه ماتبغي ادخنا وهذا يصارخ وهذاك يفاتن وعيايز محتشرات يبغن يطوفن......يعني زحمه بشكل فضيع وجان يدزوني شويه علي الشرطي جان يصرخ علي ويقولي انت شوووو فيك شو تبغي قلت له ماشي الله يسلمك انا اتريا الأوتوبيس جان يضحك وبعد شويه فتحوا الباب واستوت اركض ماتركض وهذا فوق هذا وجان اوصل علي السطح بسلام
واول مادخلت عرفت ان الحياة صعبه والواحد لازم يقدم تنازلت اذا يبغي يعيش واطريت اني اتنازل عن الهدف الأول وهو بوكس المصاحف
وبعد دقيقه اطريت اني اتنزل بعد عن الماي 
واخيراً تنازلت عن الزوليه وقلت المهم احصل مكان وايلس

وبعد بحث عميق حصلت مكان .... عند السلم المتحرك لوووول حتى يوم اسجد واقوم يتم السير البلاستيك الأسود مال السلم المتحرك يحك في ظهري يعني لا اهداف استراتجيه ولا خرابيط 

قدمت كل التنازلت وتميت مثل الفقير ادور مكان....اي مكان المهم اصلي ولا اتم واقف مثل الطير في نصهم والله ستر وحصلت مكان......
سبحان الله يلست عدال واحد مغربي وجان اقوله بكل اسى وحزن تدري اني قدمت تنازلت كثيره عشان احصل مكان وجان يضحك المسكين وقالي اقعد اقعد انا مثلك.... قال انا كنت ابغي ايلس عدال التكيف والماي والمصاحف والحين زي ماتشوف.....
قلت له يعني ماشتكيلك جان يضحك وقال يالله خله علي الله

الحمدلله علي كل شي ورجعت البيت سالم الحمدلله بس طبعاً بدون الكرسي ولا اسجاده ولا السفره بس اهم شي ماخسرت نعالي لوووووول
شوووووو تتحرون النعال شويه....شارنه ب20 ريال سعودي يوم فقدت نعالي وضحيت بالسجاده والكرسي والسفره عشان احافظ علي هذا النعال 

واول مادخلت علي الوالده جان تقول عوذ بالله شوووو هاااا
قلت لها مايهمج المهمه تمت علي اكمل وجه......قالت اي اكمل وجه وراد بدون كرسي ولا سجاده ولا سفره.......جان اقولها لا طال عمرج انا تبرعت بهن ..... قالت ادري نفس نعالك الأمسي 

كانت مأساة بنسبه لي لكن الحمدلله والله يسر الأمور